Photography Basics : 6 White Balance - أساسيات التصوير : ٦ توازن اللون الأبيض

… السلام عليكم

عشان الاستفادة تبقي كاملة راجع الدروس القديمة من هنا

مسألتش نفسك ليه ممكن الصورة تطلع ألوانها صفرا أو زرقا وانت بتصور ؟؟

وليه ممكن ألوان الصورة تبقي مش دقيقة ؟ وايه احسن طريقة لضبط الألوان من الكاميرا مباشرة ؟؟

White Balance الدرس ده هيجاوب على كل الأسئلة دى , درس النهاردة عن توازن اللون الأبيض

بداية لازم تعرف إن الضوء بيختلف باختلاف الحاجة اللى بتنور مش بتكلم على جودة الإضاءة إنما المقصود الخصائص اللونية للنور

ربنا خلق الانسان بامكانيات رهيبة كلها تدل على عظمته ومن ضمنها موضوع تمييز الألوان يعني هتلاقي إن عقلك بيقدر يميز الألوان – وخلينا نحددها دلوقتي في اللون الأبيض عشان اللون الأبيض هو أساس الالوان كلها – هتلاقى عقلك بيقدر يميز اللون الأبيض باختلاف مصادر الاضاءة المختلفة والكلام هنا عن المعلومة النهائية اللى وصلتلك وأدركتها ” إن اللون ده أبيض ” بغض النظر عن اللون اللي عينك سجلته

لما بنصور الكاميرا بتنقل اللى قدامها مش اللى احنا شايفينه وبالتالى بتنقل اللون اللى قدامها

وبما إن كل ضوء ليه خصائص لونية مختلفة بتتسمي الحرارة اللونية عن التاني فلازم الكاميرا تفهم إية نوع الضوء اللى في الصورة عشان تظبط الألوان بناء علي كدة

عملية معالجة الضوء في الصورة عشان تحسب الخصائص اللونية ليه وتشيلها فتخلى الألوان طبيعية اسمها : توازن الأبيض

وكل كاميرا فيها مجموعة من الإعدادات المسبقة لمصادر الإضاءة المختلفة تخليك تقدر تاخد أقرب إعدادات للواقع بدون الدخول في حسابات كتير

ولكن علشان الموضوع يبقي علمي كان لازم يكون في وحدة قياس للنقطة دى, زى ما المسافة بتتقاس بالمتر والوزن بالكيلو وحدة قياس الحرارة اللونية اسمها كيلفن

K وبيرمز لها

الجدول ده هيوضح الموضوع أكتر بكل مصدر إضاءة وحرارته اللونية بالاضافة للوضع المناسب ليها في الكاميرا

مصدر الاضاءة – الحرارة اللونية – الوضع المناسب

وده مكان إعدادات توازن الأبيض في الكاميرات كانون ونيكون

دى صورة صورتها السنة اللى فاتت في أسوان هتوضح الفرق بين أوضاع توازن الأبيض المختلفة، لاحظوا ان الاضاءة واحدة واللى اختلف بس طريقة فهم الكاميرا للاضاءة دى وده اللي بيخلينا ممكن نستخدم أوضاع مختلفة عن الوضع المناسب للنور لو حبينا فنعمل تأثير فني للصورة

Sample White Balance تأثير توازن اللون الأبيض

وعشان الموضوع يوضح أكتر خلينى اقولكم ان في مؤشرين للحرارة اللونية

Temp المؤشر الأول

وده بيكون فيه الدرجات من البرتقالى للأزرق بمعني إنك لو زودت الدرجة هتزود برتقالى أو أصفر ولو قللت هتزود الأزرق وهكذا

Tint المؤشر الثاني

وده بيكون فيه الدرجات من الأخضر ماجينتا “البنفسجي ” والاتنين بتقدر تتحكم فيهم من برامج المعالجة زى اللايت روم أو الكاميرا رو وده مكانهم في البرامج

color Temperature and Tint تعديل الدرجات اللونية

JPGحاجه كمان لو انت مصور رو هتقدر تتحكم فى توازن الأبيض بشكل كامل في برامج المعالجة بل هتلاقي كمان الأوضاع بتاعة الكاميرا موجودة لو حبيت تستخدمها ولكن لو مصور جي بي جي هيبقي التحكم محدود

White Balance presets إعدادات توازن الأبيض المسبقة

نفهم من كدة إنك لو بتصور رو أهمية ظبط الوايت بالانس مش بتبقي زى ال جى بى جى لإنك لو مصور رو هتقدر تعدل إعدادات توازن الأبيض في برامج المعالجة

Custom White Balance ضبط توازن الأبيض يدوي

بالاضافة للأوضاع اللى فوق ممكن تظبط إعدادات توازن الأبيض يدويا باستخدام أدوات مختلفة زى مثلا

كارت أبيض – كارت رمادى – كارت الألوان

هنشرح أول أداتين وهنخلى كارت الألوان لوحدة في درس تاني لانه طريقة متقدمة شوية وغير مستخدمة في المستوى المبتدئ

تطبيق على استخدام توازن الابيض اليدوى من احد دورات فوتوخانة

زى ما واضح في الصورة الموديل أو الهدف اللى بتصوره بتغطى أهم جزء فيه بالكارت الأبيض/الرمادى وتاخد صورة تحاول تملى الإطار بالكارت وبعدين بتدخل على إعدادات الكاميرا وتختار الصورة دى ان الكاميرا تضبط عليها توازن الأبيض

الكاميرا بتقدر تطلع تأثيرات الألوان اللى جت من المصادر المختلفة للضوء بشكل لو التأثيرات لو سجلتها على اللون الأبيض أو الرمادى، فبالتالى لما هتديها صورة للكارت في الاضاءة دى، وتخليها تحسب الحرارة اللونية للاضاءة الواقعة عليها هتطلع بنتائج أحسن بكتير من استخدام توازن الأبيض التلقائى

هتدخل على قائمة كاميرتك وتعدل توازن الأبيض اليدوى زى الصورة دى بانك تختار صورة الكارت اللى لسة مصورة وبكدة تبقي فهمت الكاميرا إنها تاخد إعداداتها من الصورة دي