في البداية ياريت تراجع الدرس الآول اللي بيتكلم عن التعريض والتحكم في الكاميرا من هنا

الدرس ده هيكون عن العدسات، فى الأول خلينا نعرف العدسة دى بتعمل إية وبتتكون من إية

العدسه هي الجسم المسئول عن نقل الصورة ( الضوء المنعكس علي الاجسام لسينسور الكاميرا ) واللي بدوره بيسجلها والكاميرا بتعملها معالجة وتحفظها في وسيله الحفظ –

الصورة دى بتشرح مراحل مرور الضوء بالعدسة لحد ما يوصل للسينسور الكاميرا” حد خد باله فى كام مرحلة*

يعنى العدسة هى اللى بتنقل الضوء من برة للسينسور وبالتالى ممكن العدسة تأثر على جودة الصورة وتخلى الكاميرا ما تطلعش الجودة بتاعتها كاملة

 ودى مجموعة من عيوب العدسات اللى لازم تبقى عارفها كويس عشان لما تدور على ريفيو لعدسة من على الانترنت

  ( بيتعالج في الايديت ) Loss of Contrast تقليل التباين الكونتراست –

لا يعالج )  مش شارب -بتهرب فوكس – الصورة ناعمة) –

 ( يعالج في الايديت ) Chromatic Aberration  انحراف لونى وفيه بيبقى فيه تداخلات ألوان غير مرغوب فيها خصوصا على الحدود بين التكوين والخلفية -يعالج بحدود

Distortion تشوية فى آبعاد الصورة –

الصورة دى فيها توضيح للمشاكل اللي ذكرناها فوق

أشهر مواقع مقارنة العدسات والريفيوهات*

kenrockwell.com

Dxomark.com

كدة عرفنا العدسات وبتأثر على الصورة وجودتها إزاى وده هيساعدنا اننا نقرر نشتري ايه ومنشتريش ايه  ..نيجى بقى للجزء التانى ..الطول البؤرى اوالفوكال لينس

الطول البؤرى |Focal Length

الطول البؤرى للعدسة كل ما يكبر كل ما زاوية رؤية العدسة تبقى أضيق  يعنى العدسة ال 35 مللى بتشوف زاوية أوسع من العدسة ال50MM  والعدسة ال50MM  بتشوف زاوية اوسع من ال100MM مللى وهكذا ….

وكل ما الفوكال لينس يتغير تصنيف العدسة نفسه وبالتالى استخدامها بيتغير شوفوا الجدول ده هيوضح الفكرة

علاقة الطول البؤرى باهتزاز الصورة

عشان نفهم الموضوع ده ببساطة ..لو معاك كشاف ليزر ونورت أى حاجة قريبة منك وهزيت إيدك وجربت انك تنوره على مبنى بعيد وهزيت إيدك  نفس الهزة إية اللى بيحصل؟؟

الإهتزاز اللى حصل على الجسم القريب أقل بكتير اوى من اللى حصل على البعيد

وده نفس الفكرة اللى بتوضح علاقة اهتزاز الصورة بالفوكال لينث

كل ما الطول البؤري  يزيد كل ما خطر إن يحصل اهتزاز فى الصورة يزيد ..طب نحسبها إزاى ؟

ببساطة خلى الشاتر بتاعك لو عدستك ما فيهاش فى أر ( مانع أهتزاز ) ميقلش عن واحد على رقم الفوكل لينس ..

ده لو كاميرتك فل فريم ولو كاميرتك كروب فريم احسب الطول البؤرى الحقيقى لعدستك واقسم عليه

( ملحوظة الطؤل البؤرى للعدسة بيتغير مع حجم السينسور يعنى العدسة ال 35 على الفل فريم بتدى تقريبا 52 مللى على الكروب فريم عشان تحسب معدل الكروب إضرب الفوكال لينس فى 1.5 لو نيكون و 1.6 لو كانون )

معنى كدة ان لو عملنا الفوكال لينس 250 فأقل شاتر سبيد” سرعة غالق ” نقدر نستخدمها هي 1/250

أما بقي لو العدسه فيها مانع اهتزاز هتقدر تقلل السرعه من ٣ لاربع مرات حسب العدسة

يعني ايه :

يعني لو كنت مستخدم عدسه ٢٥٠ الشاتر الاقل يبقي ١/٢٥٠ لو في مانع اهتزاز وقللت ل ١/١٢٥ دي كده مرة قللت ل ١/٦٠ يبقي مرتين والمره دي بتتسمي ستوب أو وقفة

العدسات البرايم ” الثابتة ” والعدسات الزووم 

العدسات البرايم ببساطة هى عدسات ببعد بؤرى واحد ما بتتحركش زى العدسة ال 35 او ال 50 او 85 وخلافه وده اللى بيخلى الكواليتى بتاعتها  أعلى بكتير من العدسات الزووم حتى الزووم الغالية لو الاثنين فيهم نفس الألية ونوع الزجاج  

 وطبعا لإن العدسات البرايم فتحة العدسة بتبقى واسعة جدا فبتقدر تصور بيها بالليل بشاتر عالى نسبياً عن العدسات الزووم تاريخيا أول حاجة اتعملت كانت العدسات البرايم وبعد كده عشان يدوا مرونة اكتر للمصورين عملوا العدسات الزووم اللى بتبقى بتتحرك بين بعدين بؤريين زي 18-55 آو 18-135 آو 70-300 وهكذا

العدسات البرايم لحد دلوقتي فيها امكانيه عمل فتحات عدسة واسعة جدا وصلت في بعض الموديلات ل فتحة ٠.٩٥ يعني اقل من ١ و عشان نعرف الفرق الكبير والإضافة اللى بتعملها العدسة البرايم للى بيصور بيها تعالوا نشوف الفرق بين كمية الضوء اللى بتدخلها العدسة البرايم للسينسور و العدسة الزووم فى الجدول ده – ملحوظة دلوقتي سيجما نزلت عدسات زووم بفتحه ١.٨ )

بخصوص الجودة فشركات العدسات  مافاتهاش الموضوع فعملت العدسات الزووم اللى بتدى كواليتى عالية مقارنة بعدسات الزووم العادية لكنها مقدرتش  توصل لجودة العدسات البرايم فى كل الأحوال اللي بتستخدم نفس التكنولوجيا والزجاج

 N Series نيكون سمتها ال
L Series وكانون سميتها ال

فى بعض العدسات الزووم  أضيق فتحة عدسة بتتغير مع تغير الفوكال لينث اللى انت عليه ي

يعني فى ال ١٨-٥٥ لو على ١٨ تلاقى أوسع فتحة ٣.٥ و  اضيق فتحة عدسة ٢٩ مثلا ولو على ٥٥ تلاقى اوسع فتحه ٥.٦ اضيق رقم ٣٦ وهكذا

ملحوظة مهمة

في قاعدة عامة بتقول إنك عشان توصل لأحسن جودة من العدسة ما تصورش ولا على أعلى رقم فتحة عدسة ولا على أقل رقم فتحة عدسة خصوصا في العدسات الاقتصادية

في النهاية في مجموعة من الإكسسوارات بتركب علي العدسات عشان تحسن من أدائها و تعمل وظايف معينة الإكسسوارات دي هي الفلاتر ودي اللي هنتكلم عليها في الدرس اللي جاي