أهلا بيكم في سلسلة دروس أساسيات التصوير المقدمة من فوتوخانة
أول حاجة لازم نعرف إن الصورة اللى بنشوفها ما هى إلا انعكاس الضوء على الأجسام وبعد كده الانعكاس ده بيجى فى عنينا فبنشوفها من خلال الشبكية وإن الكاميرا بتشتغل بنفس الفكرة بس مع استبدال العين بحاجة اسمها السينسور أو الفيلم
السينسور هو جسم مستطيل حساس للضوء بيسجل الصورة اللى بتيجى علية في صورة الإضاءة المنعكسة من خلال أجسام صغيرة اسمها البكسل لأجزاء من التانية وبعدين تتعالج وتتنقل لكارت الذاكرةالموجود في الكاميرا …
الكاميرا بتتكون من علبة ضلمة تماما وفيها السينسور ده من جوه و قدام السينسور فى فتحة عاملة بيغطيها ستاير بتقفل عليها إسمها ستائر الغالق أو الشاتر الغالق دي اللي بتبقي قافلة علي العلبة اللى فيها السينسور تماما
ولما بندوس على زرار التصوير ” الشاتر ” بتفتح الستارة دى وتقفل بسرعة وبالتالى بيدخل شوية من الضوء المنعكس ده للسينسور فتتسجل الصورة …
دى ببساطة فكرة الكاميرا …
كمية الإضاءة اللي بتبقي موجودة في الصورة بتتسمي التعريض Exposure واتسمت كدة نسبة لتعرض السينسور للضوء وبنستخدمها عشان نعبد عن مدي الإضاءة اللي جوه الكادر يعني لو الصورة مضلمة بنقول تعريض ناقص “under Exposed ” ولو منورة بنقول تعريض زائد “Over Exposed ” .
طيب إية عناصر التحكم فى التعريض Exposure ” النور الموجود في الكاميرا “
هما 3 حاجات ركزوا معايا بقى كده …
١- سرعة الغالق او ال Shutter speed
٢- فتحة العدسة -aperture size-F number
٣- الايزو ISO “
وهنتكلم على واحدة واحدة بشكل مبسط ..
أولاً سرعة الغالق : Shutter Speed
سرعة فتح وقفل الغالق أو بمعني أخر الوقت اللي بيفضل فيه الغالق مفتوح وبالتالي السينسور معرض للنور عشان الكاميرا تصور او تسجل اللقطة
سرعة الغالق بتتقاس بجزء الثانية بيوصل فى بعض الكاميرات من اول 1\8000 يعنى جزء من 8000 جزء من الثانية و لحد 30 ثانية
“لو عايز وقت أطول ممكن تخليه على وضع ال bulb يعنى الشاتر يفضل مفتوح طول ما انت دايس على الزرار”
كل ما زودت زمن اللقطة او الزمن اللى الشاتر بيبقى فيه مفتوح هتلاقى كمية ضوء دخلت أكتر للسينسور وبالتالى الصورة هتبقى فيها منورة أكتر
الشاتر كمان بيتحكم فى تسجيل الحركة علي سبيل المثال : لما بتصور حاجة بتتحرك بسرعة شاتر عالية بتثبت حركتها ولما بتصور نفس الحاجة بسرعة شاتر قليلة بتتسجل حركتها أو تطلع مهزوزة
فتحة العدسة /الحدقة Lens Aperture
كل كاميرا احترافية او غير احترافية لازم يركبلها عدسة عشان تقدر تتحكم فى الصورة من كادر وخلافه
العدسة عبارة عن جسم اسطواني جواه شرائح من الزجاج متقسمه لمجموعات كل مجموعة منهم ليها دور محدد عشان تنقل في النهايه الصورة اللى شايفنها بزاوية معينة للسينسور واللي بدوره بيسجلها في هيئه لقطة فوتوغرافية
العدسة بيبقي فيها شرائح تانية لونها أسود اسمها ال Diaphragm أو ال Aperture ودى للي بتتحكم في كمية الضوء الداخل بمعني انك لما بتقربهم من بعض بتقف الفتحه فالضوء يقل ولما بتبعدهم عن بعض الفتحه بتكبر فالضوء يزيد
فتحة العدسة – الحدقة بتتقاس بال Diaphram او ال Aperture واللي زى ما وضحنا كل ما حجمه يزيد الفتحه اللي بتدخل نور تقل وده اللي بيخلي كل ما الرقم يزيد الضوء الداخل من العدسي يقل وكل ما الرقم يقل الضوء الداخل يكتر ” علاقة عكسيه “
كمان فتحة العدسة بتأثر علي عمق الميدان / بتساعد فى عزل الخلفية ودى اللى بتخلى الجسم اللى بنصوره هو بس اللى ظاهر والخلفية وراه كأنها مزغللة أو مش واضحة ” معزولة ” وده بيبقى مطلوب جدا فى صور الأشخاص والبورترية فلو عايز تعزل الشخص عن الخلفية بتستخدم اوسع فتحة ممكن ولو عايز تظهر تفاصيل الشخص مع الخلفية بتستخدم فتحه اضيق وهكذا ” الصورة دى هتوضح الموضوع “
فتحة الحدقة وكل ما الرقم يزيد الفتحه تقل
الأي إس آو / الأيزو ISO
زي ما الكاسيت فيه بكرة لتعليه الصوت الكاميرا فيها مؤشر لزياده التعريض أثناء التصوير أو لتفتيح الصورة بد التقاطها , المؤشر ده هو الأيزو ..
معني كده ان كل ما الأيزو يبقي أقل كل ما الصورة تبقي مضلمة اكتر وكل ما الأيزو يبقي أعلي كل ما الصورة تبقي منورة اكتر مظبوط, بس مش معني كده إنك تعلي الايزو علي الأخر باستمرار لإن الأيزو لما بيعلي بيعمل حاجة اسمها التحبب أو ال Noise وده بيبقي زى تشويش علي الصورة ناتج من زياده الاضاءة بنفس فكرة الكاسيت لو عليت الصوت علي الأخر بتلاقي نقاء الصوت قل .
مدي التحبب في كل كاميرا عند ارقام الأيزو العاليه بيختلف من كاميرا للتانية ودايما نقطه قوية بيتنافس عليها مصنعي الكاميرات لان التصوير في الاضاءة المنخفضة ميزة قوية جدا – الصورة اللي تحت مثال علي تحبب الأيزو- ISO Noise
M لف البكرة لوضع
١- اختار فتحه العدسة المناسبة ليك حسب لو حابب تعمل عزل ولا لأ
٢- اختار سرعة الغالق المناسبة من حيث ثبات الهدف اللى هتصوره او حركته
٣– بص على الشاشة هتلاقي مؤشر زى المؤشر الموجود ده اسمه
Exposure meter مؤشر التعريض
ده وظيفته إنه يقارن ما بين التعريض الموجود في الصورة والإضاءة الخارجية عشان يقولك الصورة هتطلع منورة ولا مضلمة قبل ما تصور، فلما تعرف كدة تقدر تغير في قيم المؤشرات الموجودة ” سرعة غالق – فتحة حدقة / عدسة – أو أيزو ” عشان توصل للتعريض المثالي واللي بتقدر توصله لما يكون المؤشر علي الصفر
٤- اختار رقم الايزو المناسب جرب تعلي او تقلل قيمة الأيزو لحد ما توصل للقيمة المناسبة مع مراعاة ان الأيزو كل ما يزيد الصورة هيبقي فيها تحبب أكتر وكل ما يقل هيبقي التحبب أقل – غير في قيم الأيزو لحد ما توصل للصفر
كدة إنت خلصت أول درس وده التطبيق المطلوب منك
١- جرب تصور أكتر من مرة باستخدام إعدادات مختلفة
٢ – مطلوب إنك تكون بتعرف تعمل عزل أو تلغي العزل من الصورة
